Furlans dal Gurizan

Furlans dal Gurizan

Ream Unît: prin spot televisîf par cornic

Lis lenghis si fasin cognossi ancje par mieç dai messaçs publicitaris, tant plui se si cjatin intune condizion di minorizazion fuarte. Par chest e à vût un rivoc no di pôc la decision di une imprese di gjelâts de Cornualie di trasmeti, su diviersis des televisions privadis britanichis plui impuartantis e in prime serade, un spot di trente seconts dut fevelât par cornic. E je la prime volte che cheste piçule lenghe celtiche e ven doprade par une publicitât televisive che e rive tes cjasis di dut il Ream Unît. La campagne publicitarie e previôt ancje la pussibilitât di discjariâ dal sît internet de aziende un manualut minim di fraseologjie par cornic. La idee di fonde de iniziative e je che par esaltâ l’ûs di ingredients sans e locâi e la lavorazion artesanâl dal prodot nol è nuie di miôr dal doprâ la lenghe carateristiche dal lûc.
Font: The Guardian, 20/05/16

Ve culì il leam par viodi il spot: https://www.youtube.com/watch?v=kFz-U2gSmGg

Taule taronde a Lucinîs

Ai 4 di Avrîl dal 2016, te suaze des manifestazions pe Fieste de Patrie dal Friûl, Us invidìn te Sale civiche di Lucinîs, aes 8.30 di sere, par una “taule taronde” cun ospits di gale sul teme “POLITICHIS PE TUTELE E VALORIZAZION DE LENGHE E CULTURE FURLANE IN Dì DI VUÊ”.
Si resonarà sul Friûl di cumò in rapuart a chel che al à viodût nassi dal bas il Moviment Friûl.
Ospits: Adrian Cescje e Marco De Agostini dal Moviment Friûl, il president de Assemblee dai Comuns di Lenghe Furlane Diego Navarria e il conseîr regjonâl Claudio Violino.

3 Avril Lucinîs

 

Triest patriarcjine e Fieste de Patrie

O publichìn un articul dal prof. Gianfranco Ellero di coment ae resitencis (pocjis, ma che a àn ronât a fuart) su la istituzion de Fieste de Patrie dal Friûl par mieç di une gnove leç regjonâl.

Cuant che il Patriarcje al jere il siôr di Triest!

di Gianfranco Ellero

Il vôt dal Consei regjonâl dai 17 di Març dal 2015, che al à istituzionalizât la “Fieste de Patrie dal Friûl” – ideade di don Francesco Placereani e fin dal 1978 organizade dal Istitût Ladin-Furlan –al è un at di alt valôr culturâl e simbolic, in perfete linie cu la storie de nestre regjon.

Se la leç e ves istituzionalizât une “fieste dal Friûl”, te delimitazion de Provincie di Udin, o  “dal Friûl furlanofon”, e varès manifestât une volontât secessioniste, lecite di sigûr ma no in linie cu la storie de nestre regjon, fie e erede de Patrie dal Friûl (une vaste provincie che e ubidive a une sole leç votade dal Parlament), nassude sul calc de “Cjargne” di Aquilee,  trasformade in ducât dai Langobarts, e in Patrie (tal sens medievâl) dai Patriarcjis: o stin fevelant di une regjon multietniche e multilengâl sei in sens orizontâl o gjeografic che in sens verticâl o sociâl, de durade plurisecolâr (dal 1077 al 1805, forsit de prime, se Everardo, duche franc dal Friûl viers l’an 850, al è ricuardât come “princeps patriae” intun imni aquileiês).

Isal puest par Triest te Patrie dal Friûl?

Se si cognòs la storie, la rispueste e je afermative, parcè che il Patriarcje di Aquilee al fo adiriture proclamât siôr di Triest! Pio Paschini al scrivè, di fat, te sô “Storie dal Friûl”, che Triest, blocade  dai venezians aromai siôrs de Istrie, e fo liberade tal 1380 graciis a une azion militâr cumbinade, dai furlans vie tiere e dai gjenovês vie mâr; e dopo, al scrivè ancjemò il Paschini, “i citadins a meterin Triest tes mans dal maressial patriarcjâl e ai 13 di Lui i sorestants de citât cun dut il consei a crearin il patriarcje siôr di Triest …”. Di li a pôc, dut câs, la citât e colà in man al duche Leopoldo de Austrie: al jere il 1382.

No podìn dopo dismenteâ che fin ae fin dal Sietcent a Triest si continuà a fevelâ il “tergjestin”, un furlan refudât dopo dal popul venetizât ma restât in vore come lenghe nobile fin ae metât dal Votcent fra “lis tredis fameis” de Citât (di viodi i saçs di Ascoli e Cavalli). E no sono di clare origjin furlane tancj cognons di Triest?

Ma le date dai 3 di Avrîl e pues jessi a bon dirit festezade ancje a Puart, San Michêl e so teritori, fin al 1807 te Patrie dal Friûl, vuê tal Venit. Dome la Val Cjanâl no à mai fat part de Patrie.

Si pues disi, in fin, che il 3 di Avrîl al podarès jessi  ricuardât ancje a Pola, Parenzo, Lubiane, Vilac, citâts comprendudis te Metropoli dai Patriarcjis di Aquilee …

No in linie cu la storie, par resons masse comprensibilis par jessi comentadis chi, a son lis propuestis di chei che cumò a proponin la “Fieste de Vignesie Julie”, une regjon fantasime, cun confins mai stabilîts ex-lege, e in ogni câs “contignude” te antighe e nobile Patrie dal Friûl (culì al è obligatori la inviade ae leture di “Vignesie Julie, la regjon inesistent” di Gino di Caporiacco).

Toponomastiche di Gurize

Us invidìn a un altri apontamente culturâl. Sabide ai 9 di Mai, aes 8.30 di sere li de sede gurizane de Societât Filologjiche Furlane, il prof. Franco Finco al presentarà la sô ricercje su la Toponomastiche furlane dal teritori comunâl di Gurize. Us spietìn!

Ascoli, Friûl e Vignesie Julie a Lucinîs

Te suaze de Fieste che e ricuarde la nassite de Patrie dal Friûl, o vin il plasê di invidâUs miercus ai 15 di Avrîl dal 2015 aes 20.30 ae presentazion dal libri “Il Friuli e la Venezia Giulia secondo Graziadio Isaia Ascoli – Incompatibilità tra nazionalismo e regionalismo” par cure di Gianfranco Ellero. La serade si fasarà te sale Bons. Luigi Faidutti de CRA di Lucinîs, in vie Visini 2 a Lucinîs.

Chest al è il volum n. 20 de Golaine di Studis sul Autonomisim publicade dal Istitût Ladin Furlan “Pre Checo Placerean”.

Sul finî dal dibatit a vignaran distribuidis lis bandieris furlanis e, par saludâsi, si fasarà un ghiringhel.

Atac al insegnament dal furlan 2014-2015

O postìn i doi articui dal MV di Pordenon dulà che une dirigjente scolastiche si è permetude une iniziative dal dut ilegâl rispiet ae aplicazion de leç sul insegnament dal furlan a scuele. Chest il prin articul.

Lis reazions imediadis sui social cun plui di 100 post (par plui dal 50% a favôr) a àn puartât ae publicazion di un altri articul simpri sul stes argoment, segn che no si permèt plui ai mieçs di comunicazion di provocâ cence reazions e che o stin cjapant pratiche cui gnûfs mieçs di comunicazion simpri plui impuartants rispiet ae solite letare al diretôr.

Pages:12