Furlans dal Gurizan

Furlans dal Gurizan

Triest patriarcjine e Fieste de Patrie

O publichìn un articul dal prof. Gianfranco Ellero di coment ae resitencis (pocjis, ma che a àn ronât a fuart) su la istituzion de Fieste de Patrie dal Friûl par mieç di une gnove leç regjonâl.

Cuant che il Patriarcje al jere il siôr di Triest!

di Gianfranco Ellero

Il vôt dal Consei regjonâl dai 17 di Març dal 2015, che al à istituzionalizât la “Fieste de Patrie dal Friûl” – ideade di don Francesco Placereani e fin dal 1978 organizade dal Istitût Ladin-Furlan –al è un at di alt valôr culturâl e simbolic, in perfete linie cu la storie de nestre regjon.

Se la leç e ves istituzionalizât une “fieste dal Friûl”, te delimitazion de Provincie di Udin, o  “dal Friûl furlanofon”, e varès manifestât une volontât secessioniste, lecite di sigûr ma no in linie cu la storie de nestre regjon, fie e erede de Patrie dal Friûl (une vaste provincie che e ubidive a une sole leç votade dal Parlament), nassude sul calc de “Cjargne” di Aquilee,  trasformade in ducât dai Langobarts, e in Patrie (tal sens medievâl) dai Patriarcjis: o stin fevelant di une regjon multietniche e multilengâl sei in sens orizontâl o gjeografic che in sens verticâl o sociâl, de durade plurisecolâr (dal 1077 al 1805, forsit de prime, se Everardo, duche franc dal Friûl viers l’an 850, al è ricuardât come “princeps patriae” intun imni aquileiês).

Isal puest par Triest te Patrie dal Friûl?

Se si cognòs la storie, la rispueste e je afermative, parcè che il Patriarcje di Aquilee al fo adiriture proclamât siôr di Triest! Pio Paschini al scrivè, di fat, te sô “Storie dal Friûl”, che Triest, blocade  dai venezians aromai siôrs de Istrie, e fo liberade tal 1380 graciis a une azion militâr cumbinade, dai furlans vie tiere e dai gjenovês vie mâr; e dopo, al scrivè ancjemò il Paschini, “i citadins a meterin Triest tes mans dal maressial patriarcjâl e ai 13 di Lui i sorestants de citât cun dut il consei a crearin il patriarcje siôr di Triest …”. Di li a pôc, dut câs, la citât e colà in man al duche Leopoldo de Austrie: al jere il 1382.

No podìn dopo dismenteâ che fin ae fin dal Sietcent a Triest si continuà a fevelâ il “tergjestin”, un furlan refudât dopo dal popul venetizât ma restât in vore come lenghe nobile fin ae metât dal Votcent fra “lis tredis fameis” de Citât (di viodi i saçs di Ascoli e Cavalli). E no sono di clare origjin furlane tancj cognons di Triest?

Ma le date dai 3 di Avrîl e pues jessi a bon dirit festezade ancje a Puart, San Michêl e so teritori, fin al 1807 te Patrie dal Friûl, vuê tal Venit. Dome la Val Cjanâl no à mai fat part de Patrie.

Si pues disi, in fin, che il 3 di Avrîl al podarès jessi  ricuardât ancje a Pola, Parenzo, Lubiane, Vilac, citâts comprendudis te Metropoli dai Patriarcjis di Aquilee …

No in linie cu la storie, par resons masse comprensibilis par jessi comentadis chi, a son lis propuestis di chei che cumò a proponin la “Fieste de Vignesie Julie”, une regjon fantasime, cun confins mai stabilîts ex-lege, e in ogni câs “contignude” te antighe e nobile Patrie dal Friûl (culì al è obligatori la inviade ae leture di “Vignesie Julie, la regjon inesistent” di Gino di Caporiacco).