Furlans dal Gurizan

Furlans dal Gurizan

Il “Grande Friuli” no nus plâs

Confin fûr dal Friûl

O publichìn chi sot un test scrit tal 2012 dai nestri socis Sandri Pian e Michele Calligaris.

Il “Grande Friuli” no nus plâs, miôr chel di simpri.

Al è di un pôc di timp che sui gjornâi e tai discors di cualchi sorestant di chenti si sintin a nomenâ dôs peraulis gnovis: “Grande Friuli”.
Ce dal diaul isal po?
Une sorte di clon de “Grande Serbia”, ma raventât cualchi centenâr di miis plui a tramontan?
La robe no nase di bon, anzit, e puce di frait…e no pôc! …come chei che le doprin no par fâ i interès dal Friûl ma par fâi dam.
L’adietîf “Grande” al sburte une idee di Friûl e, soredut, di Popul furlan imperialist, cu la sclope a muse, pront a la concuiste; int che a cîr di paronâ in cjase di chei altris. I Furlans, di cualsisei lenghe, cun dut ce che a àn vût di gloti vie pai secui, no àn mai sporcjade la lôr bandiere di sanc ancje se, salacor, a àn scugnût lâ a “difendere la Patria” … di chei altris.
Noaltris o refudìn cheste definizion pal fat che il Friûl al è chel che la storie e à viodût a nassi, vâl a dî chel teritori individuât dai Langobarts come lôr prin Ducât e, di in chê volte, cognossût parie di ducj i popui dentri e fûr dai siei confins. I confins: cuâi sono chei dal Friûl? Chei dal Patriarcjât di Aquilee?
Se si va a cjalâ la storie, nissun nol po dineâ che a sedin chei dal flum Livence a bonât, dal Timâf a jevât e de creste da lis Alps fin jù te marine, che al cjapave dentri sei il stât patriarcjâl di Aquilee che une biele fete de Contee di Guriza (che altre e jere in Tirol).
Cualchidun al disarà “La Contea di Gorizia non era Friuli!”. A chescj, ur rispuindìn che, a volê cirî il pêl tal ûf, il Friûl cemût che lu vin descrit parsore vie e la citât stesse di Guriza a jerin spartîts, fin dal inprin, fra il Patriarcje di Aquilee e il Cont dal Friûl che, dome daspò, cemût che al sucêt daspès, a tacarin a clamâlu Cont di Guriza par vie che al veve il cjistiel in chê vile.
Passant lis pagjinis dai libris di storie o viodìn che, dilunc dai secui, Guriza e je simpri stade calcolade come une citât logade in Friûl (“Görz in Friaul” a disevin e a scrivevin i todescs e “Friauler von Görz” si declaravin i gurizans) e cussì e je stade fin cuant che no son rivâts i nazionalisims.

“Friûl” al è une definizion storiche e gjeografiche che no si à di confondile cun chê di “Furlanie”, che e je la part dal Friûl dulà che e ven fevelâde la lenghe furlane. Par esempli: Maran isal o no Friûl? Sigûr (Maran al difindè cui dincj la Patrie cuintri di Vignesie), ma nol è Furlanie. Cussì, juste par fâ cualchi non, ancje Tischlbong/Timau, Špietar/Sant Pieri dai Sclavons e ancje Monfalcon (che al veve une sente intal Parlament a Udin!). Ma o podaressin dî compagn ancje par Plodn/Sapade o Puart.

O pensìn che al sedi avonde clâr che il Friûl al è UN, ni grant e ni piçul. E al è chel che o vin dit parsore vie.
Stant che in tancj di lôr nus domandin ce che o pensìn a rivuart dal riordenament da lis Provinciis e dai Comuns de Regjon Friûl-V.J., o podìn dî che la nestre clape e je a pro dal rispiet dai confins dal Friûl storic e, ancjemò di plui, e je pal rispiet da lis diviersis gjernaziis che a son a stâ ca di simpri, cu lis lôr identitâts e sensibilitâts. Intal moment storic di cumò, che si sintin di ogni sorte, il nestri sium al è di rivâ, inte suaze obleade dal ordenament aministratîf dal Stât talian, a un model teritoriâl sul stamp dal Trentin-Süd Tirol, ven a stâi une Regjon un grum difarente rispiet a chê di cumò, cul Friûl storic cun dignitât di Regjon o se no altri di Provincie pardabon autonome e ancje policentriche par dentri, salacor fasint bati lis dimensions provinciâls cun chês da lis diocesis. Cui che al dîs che o sin “pro-Udin” nol nus à capît par nuie o, piês, al cîr di fânus passâ par alc che no sin.

In cjase di chei altris no metìn bec.

Fieste de Patrie dal Friûl 2014

babel blu invîtIn ocasion de Fieste de Patrie dal Friûl, la Associazion Furlans dal Gurizan e organize:

Struc de furlanetât di Gurize e dal so teritori
3 di Avrîl dal 1007 a Lucinîs
lant indaûr ae prime menzion di Guriza dal 1001 e al an 568
di Sandri Pian

&

Proiezion dal documentari-interviste
Babel Blu
dal regjist Renato Rinaldi
une riflession su la bandiere furlane tant che simbul identitari

L’apontament al è joibe ai 3 di Avrîl dal 2014 aes 8.30 di sere te sale M. Luigi Faidutti, li de sede centrâl de Casse Rurâl e Artesane – vie Visini 2 a Lucinîs (Guriza).

Ducj a son invidâts!